داغ درگیسی بیلیم یوردلاریندا یاساقلانان اؤیرنجی لرین درگیسی دیر

ایران حاکمیتی نین تورک لره و تورک دیلی و ادبیاتینا اویقولادیغی چتینلیک لر آرتدیقجا یئنی موباریزه یؤنتم لری ده اورتایا چیخماقدادیر. بئله کی بیلیم یوردلاریندا درگی نشر ائتمه یولوندا چوخلو مانع لرله اوزله شن آذربایجانلی اؤیرنجی لر، چئشیتلی یول لارلا بو بوشلوغو دولدورماغا چالیشیرلار. سون زامانلاردا اینترنت اوزرینده یایینلانان درگی لرین چوخالماسی و حتی مجوزسیز شکلیلده بعضی درگی لرین نشر ائدیلمه سی بو ادعایا بیر ثبوت دور.

اورمو بیلیم یوردونون سونار درگیسی یایینلاندی

اورمو بیلیم یوردونون سونار درگیسی

اورمو بيليم يوردونون تورکجه- فارسجا ادبي، کوتورل، توپلومسال درگيسي (سونار) گوجلو اولاراق يايينلاندي. سونار درگيسي نين اوچونجو سايي بايرام آيي نين 15-ينده اورمو بيليم يوردوندا ياييلدي. بيرينجي صحيفه ده يئرلشن "باش سیز يئرينه" يازيدا، آنا ديلي گونونه توخونولوبدور. سونارين يئني ساييندا گئدن يازيلارين، باشليقلاري بونلاردان عيبارتديرلر:

بیناب آزاد بیلیم یوردونون «سؤز» درگیسینین نشرینه قاداغا قویولوب

ای یو تی اؤیرنجی: بیناب آزاد بیلیم یوردونوندا تورک دیلینده یایینلانان «سوز» درگیسینین نشرینه قاداغا قویولوب. آذر اؤیرنجی وئبلاقینین وئردیگی خبره گؤره بو درگی بیلیم یوردون تکجه تورکجه درگیسی ایدی.

قئید ائتمک لازیمدیر کی گونئی آذربایجانلی اؤیرنجی لر ایران بیلیم یوردلارینین هامیسیندا، بونا اوخشار سیخینتی لارا معروض قالماقدادیرلار. نظره گلن رئژیم بو تضییق لرله، آذربایجان میللی حرکتینین آپاریجی قوللاریندان حئساب اولونان اؤیرنجی حرکتینی ضعیف لندیرمک ایسته ییر.

ائل قیزی - ائلبیر قوشاچایلی

ائلینین شانینه دستان یارادان بیر قیزسان

سن اوغوز تورکو، قازاقسان، یا دا کی قیرقیزسان

الی قولتوق دایانیبسان باخیشین سرحدسیز

گؤرورم سن ده منیم تای آنادان یالقیزسان

غم بوکوبدور بئلینی آل یاناغین رنگی سولوب

سن ائلین دردینه یاندین، نه دئییم؟ تایسیزسان

سازی باس باغرینا چاپدیر آتینی فیرتینا سال

نه اولار «توموروس»-ون عسگرلرینی قالخیزسان

سیرداشین اولسا آنار آنلادیغین آغری لاری

نه یازیق کی اؤز ائلینده چاراسیز یالنیزسان!

آذربايجان قادينلاري و ميللي حركتيميز- آيدين توران

فمينيسم قاورامي عموميتله قادين حاقلارينا اينانما و سياسال، توپلومسال و اكونوميك ساحه لرده قادين-اركك ائشيدليگيني ساوونما اينامينا سؤيلنير. باشقاسي ايله فمينيسم قاورامي، قادين-اركك ائشيدليگي آنلاميني ايچرن و جينسل آيريمجيليغينا قارشي دوران چئشيدلي فلسفه لر، تئوريلر و حركتلري ايچرمكده دير.

بو قاورام 19-جو يوز ايلليگين اوللريندن قوللانيلماقدا اولسادا قادين حاقلاريني ساوونما قاورامي بو ايللردن چوخ اؤنجه گليشميشدير. آنجاق 1857 ايلينين 8 مارت گونو بير زيروه ساييلير. بو گونده ”نيويورك“ون ايشچي قادينلاري اؤز ايش قوشوللارينين دييشمه سي و گليرلرينين(دستمزد) آرتماسي اوچون گؤستريلر دوزنلمكله اؤز حاقلاريني قازانماغا چاليشميشديلار. بو حركت باشقا قادينلارا اولگو كيمي تانينيب قادينلارين باشقا حاقلاريني قازانماغا ماراقلانديريب و اونلاري توپلومسال آلانلاردا صحنه يه چكميشدي. سونرا لار بو گون دونياليق قادين گونو آدينا آدلانميشدير.