ائلینین شانینه دستان یارادان بیر قیزسان
سن اوغوز تورکو، قازاقسان، یا دا کی قیرقیزسان
الی قولتوق دایانیبسان باخیشین سرحدسیز
گؤرورم سن ده منیم تای آنادان یالقیزسان
غم بوکوبدور بئلینی آل یاناغین رنگی سولوب
سن ائلین دردینه یاندین، نه دئییم؟ تایسیزسان
سازی باس باغرینا چاپدیر آتینی فیرتینا سال
نه اولار «توموروس»-ون عسگرلرینی قالخیزسان
سیرداشین اولسا آنار آنلادیغین آغری لاری
نه یازیق کی اؤز ائلینده چاراسیز یالنیزسان!
عئیبی یوخ، دور گؤیه قالدیر باشینی تانرییا باخ
سن یئنیلمز ساوالان، کؤکسو قیزیل بالقیزسان!
8 مارت، دونیا قادین گونو بوتون دونیا قادینلارینا قوتلو اولسون!
Hiç yorum yok:
Yorum Gönder