آذربايجانلي هئيکل تراش (مجسمه ساز) اونلارلا تاريخي شخصیيتين هئيکليني ياراديب

آذربايجانلي هئيکل تراش (مجسمه ساز)، روحي تونا

آذربايجانلي هئيکلتراش روحي تونا’نين 70-دن چوخ هئيکلي موختليف اؤلکه لرين فرقلي شهرلرينده قويولوب. صنعتکار ايران آذربايجاني، آذربايجان، تورکيه و ديگر تورک ديللي خالقلارين تاريخي، ادبي و ميلي شخصيتلري نين هئيکللريني حاضيرلاييب. او، ايران’دا ياراديجيليغينا تطبيق اولونان محدوديتلره گؤره تورکيه’يه کئچه رک  سککيز ايل صنعتيني تورکييه ده داوام ائتديريب. 

حاضيردا کانادا’دا ياشايان روحي تونا محمد حوسئين شهريار’ين تبريزده کي  و نباتي نين کلئيبر’ده کي  هئيکللري نين مؤليفيدير. آنجاق اونون اثرلري بونلارلا قورتارمير. او، ستارخان’ين، باغيرخان’ين، دده قورقود’ون، اوزئيير حاجي بي اوو’ون، ويراني’نين، شاه ايسمایيل ختايی’نين، سهند’ين، نسيمي’نين، پيشه وري’نين، بابک’ين، امير تئيمور’ون، سلجوق بي’ين، اوغوز خان’ين، قاشقايلي ايسمایيل خان’ين، کوروغلو’نون، محمد خارزمي’نين، موصطافا کامال آتاتورک’ون، نادير شاه’ين، ناظيم حيکمت’ين، حاجي بابا خان’ين، اوچونجو سليم’ين، کوبيلاي خان’ين و دوکتور ريضا براهني’نين هئيکللري نين مؤليفيدير. 

روحي تونا هئيکلتراشليق فعالیيتيندن علاوه  يئني صنعتکارلاري دا يئتيشديرمه يه چاليشير. بو ائله اولدن اونون اينجه سنت فعاليیتي نين موهوم بير حيصه سيني تشکيل ائديب. او دئيير کي، بعضي آيتوللاهلارين فيکرينجه هئيکلتراشليق ايشي حارام اولدوغونا گؤره ايران’دا بو صنعتين اينکيشافي چوخ چتيندير. ايران’ين مدنيت ناظيرليگي ده دؤولتين دين سيياستي اساسيندا تطبيق ائتديگي محدوديتلره گؤره هئيکلتراشليغا، رسسامليغا و ديگر اينجه صنعت ساحه لري نين اينکيشافينا مانعه تؤره دير. روحي تونا’نين فيکرينجه، يوخاريدا سادالانان و اون ايللردن بري داوام ائدن محدوديتلرين نتيجه سي کيمي ايندي ايران و ايران آذربايجان’ي اينجه صنعت ساحه سينده تورکيه، آذربايجان جومهوريتي و اينجه صنعتين آزاد اولدوغو باشقا دونيوي اؤلکه لرله موقاييسه ائديله بيلمز.  " ايران’دا علي الخصوص آذربايجانليلار درين پوتئنسيالا ماليکدير و ايمکان يارانديغي تقديرده بورادا بؤيوک اينجه سنت خاديملري يئتيشه بيلر. بونا گؤره ده اونلار ايران’دان چيخاندان سونرا هئيکلتراشليق، رسامليق، موسيقي، رقص و باشقا ساحه لرده چوخ نايليیتلي اولورلار " . 

تبريزلي هئيکلتراش و رسسام روحي تونا 8 ايل تورکيه’ده ياشاييب. اونون مؤليفي اولدوغو تاريخي شخصيتلرين هئيکللري تورکيه’نين موختليف شهرلرينده اوجاليب. روحي تونا تورکيه’ده ده دي نين اينجه صنعت اوزرينده کي  تظييقيني حيس ائتديگيني، حتّي اينجه صنعت فعالیيتينه گؤره حده لرله اوزلشديگيني سؤيله يير. او، بئله مئيللري و ديندارلارين اينجه صنعته موداخيله سيني تورکيه’نين گله جگينه  تهلوکه حساب ائدير. 

روحي تونا’نين حاضيردا اوزرينده ايشله ديگي ان بؤيوک لاييحه ايران آذربايجان’ي اوچون بير سيار هئيکل موزه سي حاضيرلاماقدير. او، ايران آذربايجان’ي نين تاريخي شخصيیتلري نين هئيکللريني پلانلاشديرديغي موزه ده يئرلشديرمک آرزوسوندادير. روحي تونا’نين پلانينا اساسن بو ايران آذربايجان’ي نين سيار موزه سي کانادا’نين تورونتو شهرينده گئرچکلشه جک. داها سونرا آمئريکا بيرلشميش ایشتاتلاري و  تورک ديللي اؤلکه لرده نوماييش ائتديريله جک. 

آذربايجانلي هئيکلتراشين ان بؤيوک آرزوسو بير گون بو سيار موزه ني تبريز’ه آپاريب، هميشه ليک اورادا يئرلشديرمکدير.
Amerikanın Səsi