آماجین ائلیمین ایسته‌یی غمی
اَمه‌یین سیمگه‌دیر دایانیش‌لارا
گونش‌سیز سمادان ایلهام آلارکن
نور ساچیر قلمین قارا قیشلارا
خالقیمین سئوگی‌سی سنه کدردی
دونیانین لذتین چکمه‌ییر جانین
گئجه‌لر گوندوزلر اویاق قالیرسان...
اویانسین، اوجالسین آذربایجانین!
کؤرپه‌لر سؤزجویو سنین پاراندی
بیر گولوش سئوگی‌یه راضی‌لانیرسان
قلمین قاپاغی داییما آچیق
هر زامان دؤیوشه حاضیرلانیرسان
آدینی شرفله شانلا سَسله‌رم
ووقارین عیزتین آنلامی سن‌سن
ککره‌لر ایچینده، یالقیز آنیمدا
«دیلیمین» آغزیمین داد-تامی سن‌سن
یولوندا یورورسان خسته‌لیک‌لری
دردینی اوزونه گتیرمه‌ییرسن
هارای‌سیز سینیرسان خالقینا خاطیر
«دایانیش» یولونو ایتیرمه‌ییرسن
«یازیچی»لار مقاما پولا یازاندا
بیر ائلین یوکونو سن داشییرسان
میننتین اولماییر کیمسه‌یه سنین
«تانرینین دیلینده سن یاشاییرسان»
Hiç yorum yok:
Yorum Gönder