کئچه‌ن ايگيرمي گونده آذربايجان ملّي حرکتينده بير چوخ حادثه‌لر ايره‌لي گلميشدير.
بو حادثه‌لرين بعضي‌سي مختلف يؤندن دقته لايق‌دير. آنجاق لازيم‌دير بو مسئله‌‌دن اؤنجه كئچميشه بير نظر سالاق:
1385-جي ايلين اورديبئهيشت و خورداد آيلاريندا‌كي مبارزه‌لر
1385-جي ايلين اورديبئهيشت و خورداد آيلاريندا اوز وئره‌ن اولايلارين خاطره‌سي ابدي اولاراق آذربايجان تورک ملّتي‌نين ملّی- تاریخی یادداشیندا ثبت اولوب قالاجاقدیر! بو ایلین اوردیبئهیشت آییندا شووونیزمین چیرکین صفتی، دؤلته منسوب اولان "ایران" قزئتینده اؤزونو گؤرستدی! شووونیستلر بو قزئتین صحیفه‌‌لرینده چیخیش ائده‌رك، چوخ حساب اولموش و اؤلچولموش بیر بیچیمده ظاهر اولاراق، عموم تورک‌لره و اؤزل‌لیک‌له آذربایجان تورک ملّتینه توهین تحقیرلر ائتمیشدیلر! باشینا دؤندوگوم آذربایجان تورک ملّتی، رشید بیر ملّت کیمی میدانا گلیب، شووونیزمه قارشی چیخدی. اَن آزی اللی بئش شهر و قصبه ده اعتراض کئچریلدی. اعتراضلار دوغرودان دا آذربایجان تورک ملّتینه لایق ایدی و بو ملّتین ملّی بیرلیگینی و مدنی سویه‌سینی دوستا-دوشمنه گؤرسده بیلدی.
دؤلت آداملاری اوّلده چالیشدیلار دانیشیق، مصاحبه، بیانیه و بو کیمی ایشلرله حقّی ایران قزئتینه وئردیلر و اعتراض ائده‌نلری قیناییب دانلادیلار. بئله‌لیك‌له ایسته‌ییر‌دیلر اعتراضلاری سوندوروب، بؤیوك بیر ذلّتی تورك‌لره تحمیل ائتسینلر! آنجاق هئچ بیر ثمر قازانمادیلار و اعتراض آلوولاری داها یوكسَلدی! دؤلت آداملاری بونو گؤردوكده چالیشدیلار قاباقدان گلمیشدیک ائده‌رک، اعتراض دسته‌لری یولا سالیب، اعتراضلارین کونتورولونو اَله کئچیریب، مدیریت ائتسینلر؛ آنجاق باجارمادیلار! آذربایجان تورک ملّتی دقت، درایت و شجاعت‌له تمام حیله‌لری ضدینه چئویردی. بئله بیر حالدا دؤلت باشقا بیر تشبّثه ال آتاراق، امنیتی، انتظامی و سایر سلاحلی قوه‌لرینی میدانا گتیریب، تورک آذربایجانلیلارین مدنی اعتراضلاری‌نین قاباغینی آلیب، اَزمگه باشلادی.
بیر چوخ شهرلرده اعتراضچی کوتله‌سی‌نین قیزیل قانی کوچه‌لری آل بویادی. یوزلرجه وطن سئوه‌ر تورک باتوم، چوماق و گوللـه ایله یارالاندی و عین- حالدا چوخلو ایگید آذربایجانلی ایسه اؤز ملّتی‌نین عزّت، شرف و بؤیوكلوگو اوغروندا شهید اولدو. تبریز، خییوو (مشکین شهر) و سولدوز (نقده) دا شهید اولان شرفلی ایگیدلر، اؤز قیزیل قانلاری ایله آذربایجان تاریخینده، پارلاق صحیفه‌لر یازیب یاراتدیلار!
اعتراضچیلار اؤز یئر – یوردلاری، ائل- اوبالارینی، محلّه‌لری و شهرلری اوچون یعنی تبریز، خییوو، سولدوز، اورومیه، اردبیل، زنجان، سلماس، مرند، خالخال و... اوچون اعتراض ائتمه‌دیلر! بلکه اونلار بؤیوک، اوجا و شرفلی بیر وارلیق و ملّی وطن اوغروندا؛ یعنی آذربایجان و تورک ملّتی اوغروندا صحنه‌یه گلیب اعتراض ائتدیلر و بؤیوک ملّی بیر کیمیلگی قوروماغا چالیشیردیلار!!! بو او دئمکدیر کی، دؤیولنلر، اَزیلنلر، یارالانانلار و شهید اولانلار یالنیز آنا وطن و ملّی شرف اوچون سینه‌لرینی آجی گوللـه‌لر قارشیسیندا قالخان ائتدیلر! بو سؤزلردن آیدین و دورو بیر نتیجه‌یه چاتا بیله‌ریک: اودا بودورکی، بوتون آذربایجانلیلار تؤکولن قانلارین وارثی‌دیرلر و عین حالدا او قانلارین قارشیندا مسؤل‌دورلار! اگر او قانلار اونودولسا، او قانلار باتسا، گوناهی بوتون آذربایجانلیلارین، هامیمیز‌ین، خصوصیله فعال ملّتچیلرین بوینونادیر. ائله بونا گؤره ده فعال ملّتچیلر همیشه چالیشیرلار اؤز وظیفه‌لرینی یئرینه یئتیرسینلر!
1385-جی ایلین خورداد آییندا مختلف شهرلرین اهالیسی بیر-بیری‌نین آردی و داوامیندا اعترض ائدیردیلر. تبریز خوردادین بیری آذربایجان اعتراض سیمگه‌سینه چئوریلدی و اورومیه، خییوو، اردبیل و ... کئچیریلن اعتراضلارین داوامچی‌سی اولدولار. اعتراضلار هر گون بیر شهر و قصبه‌ده سسله‌نیردی. بعضا بیر شهرده اعتراضلار تکرار اولاراق کئچیریلیردی! بئله قهرمان شهرلرین بیری ده سولدوز شهری ایدی!
ملّی شهیدلر
سولدوز اعتراضلاری‌نین آن قاباریق گونو خورداد آیی‌نین دؤردو ( 4 ) اولموشدور. بوگون قهرمان سولدوز اهالیسی بؤیوک‌لو- کئچیک‌لی، گنجلی- قوجالی، قادینلی- کیشی‌لی و اوشاقلی اعتراضا چیخمیشدیلار. باشقا طرفدن سلاحلی قوه‌لر تپه‌دن دیرناغا قدَر یاراقلاناراق، اعتراضچیلارا قارشی و آذربایجان رشید تورک ملّتی‌نین اعتراضلارینی دایاندیریب و اونلاری سوسماغا مجبور ائتمک آرزوسو ایله میدانا گلمیشدیلر!
مدنی اعتراضلار شدت و عظمتله جریاندا ایدی، سلاحلی قوّه‌لر جیلوو گمیریردیلر و نهایت، زنجیرلری قیردیلار و مدنی اعتراضلاری دایاندیرماق اوچون قارا- قانلی بیر آخینا باشلادیلار. مسلسل‌لر چاققال كیمی چیركین- چیركین چاققیلداییردی؛ آجی گوللـه‌لرین یاراسیندان یاز گونونده قهرمان ایگیدلر، خزل اولموش یارپاقلار كیمی یئره سپه‌لندیلر. سولدوز ایگیدلرینین قانی، سولدوزون تورپاغینی قیزیل بویادی. کیمی‌سی یارالاندی، کیمی‌سی شهید اولدو. چاققال‌لار هر طرفده چاققیلداییردی و قارا قوزغونلارین قارا کؤلگه‌سی شهری بوروموشدو! آنجاق نه آذربایجان سوسدو، نه ده سولدوز!!
او گون (خورداد آیی‌نین دؤردو):
یالتاقلار، یالانچیلار، فرصت طلبلر دالدا یئر آختاریب گیزلندیلر!
سولدوز ایگیدلرینین بیر چوخو آذربایجان تورک ملّتی آدینا دؤیولوب ازیلدیلر!
سولدوز ایگیدلرینین بیر چوخو آذربایجان تورک ملّتی آدینا یارالاندیلار!
سولدوز ایگیدلرینین دؤردو، آذربایجان تورک ملّتی آدینا اؤز آل قانلارینا باتیب شهید اولدولار!
و ... آذربایجان تاریخی‌نین صحیفه‌‌لرینی اؤز قیزیل قانلاری ایله یازدیلار!
ایگیدلرین همّتی ایله سوسقونلوق نه سولدوزا، نه ده آذربایجانا كؤلگه سالا بیلمه‌دی!
و ... شهیدلر ملّتین چیگنینده تشییع اولوب، آنا وطن تورپاغینا تاپشیریلدی!
سولدوز ملّی شهیدلرینین ایلدؤنومو
سونرا شهیدلرین یئددی‌سی و قیرخی، بؤیوک طنطنه ایله کئچیریلدی. و داها سونرا شهیدلرین ایلدؤنومو آذربایجاندا یاشادی و یاشامالی‌دیر!
شهیدلرین آدلاری‌نین دیری قالیب یاشاماسی اوچون یالنیز اونلارین عزیز آتار- آنالاری، باجی- قارداشلاری یاخین یار- یولداشلاری جان آتمامالیدیرلار، بلکه شهیدلر قارشیسیندا بوتون آذربایجان، خصوصیله ملّتچیلر و اؤزل‌لیک‌له فعال ملّتچیلر مسؤل و چالیشمالیدیرلار!
هر ایل خوردادین آیی‌نین دؤردونده، سولدوزدا، دؤرد عزیز شهیدین خاطرسینه حصر اولموش مراسم‌لر کئچیریلیر! بو مراسم‌لره قاتیلانلار تكجه سولدوزلو شهیدلری یوخ بلكه بوتون آذربایجان شهیدلرینین خاطره‌سینی عزیزله‌ییرلر!
دئمك اولار بو گون آذربایجان شهیدلرینین گونودور!!!
هر ایل هم سولدوزدا اولان ملّتچیلر و هم ده آذربایجانین باشقا یئرلرینده یاشان ملّتچیلر، چالیشیرلار امکان چرچیوه‌سینده اؤزلرینی سولدوزا چاتدیریب، او عزیز شهیدلرین خاطره‌سینی یاشاییب یاشاتسینلار!
بئش ایلدی شهیدلرین ایل دؤنومو مراسمی آردیجیل قورولور. هر ایل امنیتی قوه‌لر چالیشیرلار شرایطی آغیرلاشدیراراق، مراسیمه قاتیلانلارا آغیر هزینه‌لر تحمیل ائتسینلر!
هر ایل امنیتی قوه‌لر چالیشیرلار سولدوز دا كئچیریلن مراسمی اؤز نفوذلاری آلتینا آلسینلار. آنجاق هر ایلده اوخلاری داشا دَییر! هر ایل آذربایجان فعال ملّتچیلری چالیشیرلار، امکان چرچیوه‌سینده وظیفه‌لرینی یئرینه یئتیریب بو مراسم‌لره قاتیلسینلار. و بو یولدا بوتون آغری- آجیلاری شیرینلیک‌له جانلارینا آلیرلار! چوخلاری شهرلریندن چیخاندا، بعضی‌لری یولدا، بعضی‌لری سولدوزون گیره‌جگینده بعضی‌لری سولدوزدا و یا سولدوزدان قاییداندا یاخالانیرلار! بو فعال ملّتچیلرین بیری ده عباس‌بَی لسانی‌دیر. من بیله‌نی عباس‌بَی اوچ دفعه بو ایل دؤنومو مراسملرینه قاتیلماغا سعی ائتمیشدیر. بیرینده سولدوزا چاتمامیش یاخالانیب توتولموشدو. آنجاق ایکی نؤبه ده موفق اولموشدو مراسیمه قاتیلسین! اوراجان کی، من بیلیرم هر ایکی دؤنه، سؤلدوز ملّتچیلری سایغی و صمیمیت و آچیق اوزله عباس‌بَیی قارشیلاییب عزیزله‌ییبلر. من یازیمدا بوردان اویانا عباس‌بَی باره‌سینده آرتیق یازاجاغام. چون اوز وئره‌ن اولای و حادثه‌لردن و داورانیش‌لاردان بئله دویولور كی، بعضی ضعیف شخص و دسته‌لر چالیشیرلار بو فداكار ملّتچی‌نی تخریب ائتسینلر!...
ائشیتدیگیمه گؤره بو ایل امنیتی قوّه‌لر، سولدوز آغ ساققال‌لارینی آغیر سیخینتی – بوغونتویا سالمیشدیلار. ائله بونا گؤره ده محترم سولدوز آغ ساققال‌لاری‌نین بیری، شهیدلر اوچون قورولموش مراسم آراسیندا عباس‌بَیه یاخینلاشیر و شرایطین آغیر اولدوغونو اونا چاتدیریر و اونون چیخیشلاریندان فایدالانا بیلمه‌دیكلری اوچون حرمت‌له عذر ایسته‌ییر. طبیعی اولاراق عباس‌بَی اورادا قوناق اولدوغو اوچون، مراسمی قورانلارین مصلحتینی اوركدن قبول ائدیر. بو آرادا سولدوز گنج ایگیدلری آغ ساققال‌لارین حرمتینی ساخلایاراق اؤز اعترضلارینی بیلدیریرلر. آنجاق عباس‌بَی درایت‌له اونلاری توختاق‌لیق و تمكینه دعوت ائدیر. مراسمین داوامیندا، حرمتلی سولدوز آغ ساققاللاری تصمیم توتورلار امنیتی قوه‌لرین سیخینتی حصارینی سیندیرسینلار. بونا گؤره ده عباس‌بَیه تكلیف ائدیرلر مراسم ده حاضر اولانلار اوچون دانیشسین! آنجاق عباس‌بَی مصلحت‌لری نظره آلاراق دانیشماقدان واز گئچیر و مراسم قورتاراندان سونرا، وقتین دارلیغینی، یولون اوزاق‌لیغینی نظره آلاراق سولدوزلو ملّتچیلردن و دوستلاریندان وداع‌لاشیب، گئری دؤنور. سولدوزدان قاییداندا امنیتی قوه‌لر اوتوبوسلاری‌نین قاباغینی كسیب، اوتوبوسدا اولان ملّتچیلری یاخالاییرلار، بعضی‌لرینی یاغیش آلتیندا ساخلاماقلا، یا بعضی‌لرینی استنطاق زمانی تك‌له‌ییب وورماقلا، سعی ائدیرلر اونلاری قورخوتسونلار. آنجاق ملّتچیلرین بیرلیك و دایاناتی، خصوصیله عباس‌بَیین درایتی اونلارین بوتون شئگرد و ترفندلرینی كسگردن سالیر و نهایت مجبور اولورلار تخمینا‌ً اوچ – دؤرد ساعتدن سونرا، شرط‌سیز اولاراق هامینی بوراخسینلار!
بو ماجرلارین داوامیندا "مستقل سولدوز ملّتچیلری" آدی ایله بعضی مشكوك یازیلار، بیانیه‌لر سایتلارا گؤنده‌ریلیر. سایتلارین بعضی‌سی بو مشكوك یازلاری خبر ساییب ال دَیمه‌دن استفاده ائتمیشدیلر. بو یازیلار سایتلاردا درج اولدوقدان سونرا دا تأیید - تكذیب یازیلاری آردیجیل یازیلیب یاییلمیشدیر. ماراقلی بوراسی‌دیر كی یازیلارین چوخو قوندارما، خلق‌الساعه و هویتی بللی اولمایان تاخما آدلار آلتیندا اولموشدور. بو مشكوك یازیلار اساسا‌‌‌ً عباس‌بَی لسانی‌نی هدف توتموشدور. داها دوغروسو ملّی‌حركت چرچیوه‌سینده اونون مبارز شخصیتی‌نی چیركین تعبیرلرله تخریب ائتمگی هدف توتموشدور. بعضا ده حقیقی آدلارین یییه‌لری فرصتی مناسب گؤروب «لئهلی سودان بالیق توتماق» فكرینه دوشوبلر! چالیشیبلار یوخاری بیر موضعدن مسئله‌یه باخیب، اؤزلرینه بؤیوكلوك و آغ ساققال‌لیق قازانسینلار! تأسف‌له باجارا بیلمه‌میش‌دیلر! بعضی‌لرده ضعیف دفاع ایله افتراچیلارین داها آرتیق رجز دئمه‌لرینه میدان یاراتمیشدیلار. البته بیر – ایكی موردده ده نسبی حالدا یاخشی مدافعه اولموشدو. هرحالدا بو تاخما آدلی افتراچیلارین، بئله منفی بیر تشبث‌لری ایله عباس‌بَی تخریب اولاسی دَییل! عباس‌بَی و اونون مثبت اؤزل‌لیكلری ایله چوخلاری تانیشدیر! من ده عباس‌بَیی تانییرام؛ اؤزوده چوخ یاخیندان تانیییرام:
عباس‌بَیی تانییرام:
عباس‌بَی لسانی مین اوچ یوز قیرخ آلتینجی ایلین شهریور آیی‌نین بیرینده( 1/ 6 / 1346 ) اردبیل شهرینده دوغولموشدور. آتا - بابا یوردو اردبیلین یاخینلیغیندا یئرلشن "آغ‌میان" کندی اولموشدور. رسمی و دؤلتی دفترلرده بو کندین آدینی "عموقین" یازیرلار. "آغ‌میان" هارا "عموقین" هارا، گؤرون بیزیم باشیمیزا نئجه بیر اویونلار آچیرلار؛ هم یؤردوموزن آدینی هم ده اؤز آدیمیزی زورلا دَییشیرلر! آنجاق بیز واریق....!
عباس بی اورتا مکتبی بیتیرمیشدیر. باشقا سؤزله دئسک اون ایكی كلاس درس اوخویوب و انسانی علملر بؤلومونده دیپلم آلیبدیر. اون ایکی- اون اوچ یاشلاریندان تورکجه کتابلارلا تانیش اولوبدور. سونرا 18-17 یاشلاریندا تورک دیلی و ادبیاتینا ماراغی جدّی‌له‌شیب و عسگرلیک دؤره‌سینی گئچیره‌رکن ( 1368- جی‌ایل ) اؤز كیملیگینی دریندن و آیدینجاسینا منیمسه‌میشدیر. 3/3/1373 تاریخینده سایغیلی حیات یولداشی رقیه خانیملا بیرگه یاشاماق قرارینا گلمیشلر. اوچ اوشاقلاری: بیرجه قیز و ایکی اوغول‌لاری واردیر: سئودا خانیم 16، علی بَی 13 ، مهدی بَی 12 یاشیندا. اونلارصمیمی بیر عایله قوروب، آجی - شیرین گونلرده بیر - بیرینه دایاق اولاراق یاشاییرلار! عباس‌بَی اؤز ملّتچی‌لیك فعالیت‌لرینده هر بیر اوغور قازانیرسا، یقین رقیه خانیمین حمایه‌لری‌نین تأثیرینی اوندا گؤره بیله‌ریك!
عباس‌بَی اردبیلده یاشاییر. اونون اؤزوندن شخصی بیر ائوی واردیر. عین حالدا اردبیلین معجز محله‌سینده کیچیک بیر اَتچی دکانی واردیر و اورادا اَت ساتیر. بو دکانین گلیری کئچمیشده نسبی اولاراق یاخشی ایدی. آنجاق ملّی فعالیت‌لری نتیجه‌سینده دفعه‌لرله اوزون مدت‌لی باغلاندیغی اوچون و سایر سیخنتیلارا گؤره، گلیری محدودلاشیبدیر! هر حالدا ائله بو دکانین گلیری ایله شخصی یاشام خرجلرینی تأمین ائدیر! بعضی‌لری، اؤزل‌لیک‌له بعضی شووونیست و دوشمن سایتلار و قوه‌لر، چالیشیرلار خور باخیشلاری ایله، اونو قصاب آدلاندیرالاق، اونون ملی فعالیت و ایش‌لرینی دَیه‌ردن سالسینلار! گؤرون نئجه باطل و اسكیك فكرلشیرلر! عجبا بو آرادا بعضی ظاهرا دوستلار دا، چیرکین شووونیست سایتلارا قوشولورلار و قصاب کلمه‌سی ایله اوینایاراق اؤزلرینه اوستون‌‌لوک قازانماق فكرینه دوشورلر. حال بوکی آتالار دئمیشكن:
" قوُیونون اؤزونده سو اولمالیدیر! سوسوز قویویا سو تؤکمك له قویودان سو چیخماز!"
آذربایجان ملّی حرکتینده محبوبیت، عزّت، شرف و بؤیوک‌لوک مبارزه میدانیندا اله گلیر! هر کس دوزگون یول ایله آذربایجان ملّی منافعی اوغروندا چالیشسا، و بو یولدا ایره‌لی گلن هزینه‌لره قاتلانسا، یقین ائدیرم ملّت او شخصه لازیمی قدر قیمت وئریب، سئوه‌جک‌دیر. بورادا لازیم گؤرورم عباس‌بَیین شخصیت و اخلاقی‌نین بعضی اؤزلیک‌لرینی سیز اوچون سایی‌لایام:
بعضی مراسم‌لرین قورولماسیندا فعال نقشی اولسادا باشقا دوستلارلا مشورت ائتمكدن چكینمیر. همیشه جمعی عقل و تصمیم اساسیندا ایشلری ایره‌لی آپارماغا چالیشیر. ملّی منفعت اونون اوچون اساس معیاردیر. ملّی حرکت و ملّی منافع اوغروندا همیشه فداکارجاسینا مبارزه‌یه قاتیلیبدیر. آنجاق تانینماغا، شهرت قازانماغا، اوردا - بوردا دانیشماغا هئچ تلسمه‌ییبدیر. چوخ دقیق نكته بیلندی. اؤز حدینی یاخشی تانیییر. مبارزه میدانیندا و خطر زمانی همیشه اؤن سیرایا کئچه‌رك یولداشلارینی قورماغا سعی ائتمیشدیر. هر بیر زمان اسیر دوشموش ملّتچیلری مدافعه ائتمكده بیرینجیلردن اولوبدور. گؤردوگو ایشلر و فعالیت‌لره گؤره کیمسه‌نی اؤزونه بورجلو بیلمیر. بلكه گؤردوگو ایشلری وظیفه و اؤزونو ملّته بورجلو بیلیر! تنفیدلرین قارشیسیندا همیشه سعی ائدیر اؤز وقار و متانتینی ایتیرمه‌سین! ملّتچیلر و دوستلاری قارشیسیندا صمیمی و ادعاسیز عمل ائدیر. عین حالدا دوشمنه قارشی مغرور و دؤیوشکن‌دیر.
عباس‌بَی بیرینجی دفعه مین اوچ یوز یئتمیش آلتینجی ایلده (1376) ملّی فعالیت‌لرینه گؤره اطلاعات اداره‌سینه چاغیریلمیشدیر. او تاریخدن بو گونه قدر دفعه‌لر له یاخالانیب، زندانا دوشوب و سورگون اولوبدور! بو یاخالانیب زندانا دوشمه او قدَر چوخ اولوبدوركی، سایی الیندن چیخیبدیر. البته اینتئرنئت سیته‌لرینده چوخونون راپور و ایضاحی‌نی تاپماق اولار! چوخ یاخشی اولاركامپیوتئر بیلن بیر ایگید اونلارین هامیسینی بیر وئبلاغا توپلایا!
عباس‌بَی معین نه‌دن‌لره گؤره اونیوئرسیته‌یه گئده بیلمه‌ییبدیر. آنجاق همت و باجاریقلا آزاد، منتظم و منسجم مطالعه‌لری چوخ اولوبدور. انسانی علملرین بیر چوخ بؤلوملرینده او جمله‌دن دئمک اولار: تورک دیلی، ادبیاتی و فولکلورو، سیاست علملری، سوسیولوژی، ائتنولوژی، گئنل حقوق و انسان حقلری، محض تاریخ، گئنل تاریخ، آذربایجان تاریخی، اسكی و معاصر فلسفه و... موضوع‌لاریندا جدی مطالعه‌لری اولوبدور. بو بؤلوملرین بعضی‌سینی چوخ گئنیش و درین اوخویوبدور. اونون مطالعه‌لری داواملی و اوزون سوره‌ن اولموشدور. هله ده داوام ائدیر. حتا آز قالیر اونون اتچی دكانی كتابخانایا چئوریله! زمان سوره‌جینده گئنیش و منتظم مطالعه‌لری‌نین تأثیرینی اونون محکمه‌لرده‌کی مدافعه‌لرینده گؤرمک ممکون‌دور. عباس‌بَی اؤز درین مضمونلو محکمه دفاعیه‌لرینده آذربایجان ملّی منافعینی و آذربایجان ملّی حرکتینی درین منطق و گوجلو استدلال‌لارلا قوروماغا جهد ائتمیش و بو یولدا بؤیوک اوغرولار قازانمیشدیر. عباس‌بَی لسانی ایندیه قدر مختلف موضوع‌لاردا، او جمله‌دن آذربایجان ملّی مسئله‌لری، سوسیولوژی و ... باره‌ده 15- دن آرتیق تورکجه و فارسجا مقاله‌نین مولفی اولموشدور. بو مقاله‌لر یاشیل مغان، آوای اردبیل بعضی اؤیرنجی‌سل نشریه‌لر و اینتئرنئت سیته‌لرینده یایینلانمیشدیر! عین – حالدا بونو دا دئمه‌لییم شاعرلیك ذؤوقینه ده مالك‌دیر. دده قورقوت كتابینی شعره چكیب و مین بیت‌دن آرتیق حماسی شعری واردیر. اونون مختلف مراسملرده‌کی چیخشلاری و بعضی رادیو - تئلویزیونلارلا مصاحبه‌سی، اونون سیاسی درایت و ذکاسی‌نین تمثیلی اولا بیلر!...
بورادا لازم دیر سولدوز مراسمی‌نین حاشیه‌سینده‌‌كی چیركین دئدی- قودولاری بیرداها نظردن گئچیره‌ك:
كؤلگه‌ده یاتانلار
مراسم قورولوب قورتاراندان سونرا، بعضی كؤلگه‌ده یاتانلار، تاخما و قوندارما آدلارلا بیانیه وئرمه‌یه باشلاییب و آذربایجان ملی حركتی فضاسیندا بولانیق‌لیق یاراتمایا چالیشمیشدیلار. او دا توركجه یوخ، بلكه فارسجا! (یقین فارسجا یازیرلار رئیگان دا بیلسین!!) اونلار اؤز آردیجیل یازلاریندا بئله القا ائدیرلر كی، گویا عباس بَی ایسته‌ییرمیش زورلا سولدوز مراسمینده دانیشیب چیخیش ائتسین! و بو یول ایله اؤزونه هاوادار قازانماق فكرینده ایمیش!! و....
بیانیه‌نین و یازیلارین متنی‌نی ائله تنظم ائتمیشدیلر كی، هر اوزاقدان باخان و خبردن خبرسیز اولانلار، عباس‌بَیی قیناییب، حقی اونلارا وئره بیله‌ر. آنجاق ماجرایی بورادا قورتارماییبدیر. بو مشكوك یازیلار یاییلدیقدان سونرا شهیدلر عایله‌سیندن بیر نفر مجبور اولوب حقیقتی آشكار ائتمك اوچون گوناز تی‌وی-دن دانیشا و كؤلگه‌ده یاتانلارین سؤزونو تكذیب ائده!
من بو «كؤلگه‌ده یاتان» آدینا چوخ تأكید ائتدیگیم اوچون قیسا بیر ایضاح وئرمه‌نی لازم گؤرورم: بو «مستقل سولدوز ملّتچیلری یا فعال‌لارینی» كیمسه تانیمیر حتّا شهید عایله‌لری ده اونلاری تانیمیر! آذربایجان ملّی حركتینده گیزلی بیر ایش یوخدور. علتی ده بودور كی، بیز هئچ بیر كسین علیه‌ینه چالیشمیریق! بیز یالنیز اؤز ملی و طبیعی حقّلریمیزی دیریلدیب، قوروماق اوغروندا چالیشیریق! و ... بونونلا بئله هركس حقلی‌دیر اؤز امنیتی‌نی قوروماق اوچون آدینی یا فعالیت‌لرینی گیزلی ساخلاسین! آنجاق بو گیزلی قالما اونا بوحقی یاراتمیركی، گؤزونو یوموب، آغزینی آچا و اینتئرنئت فضاسیندا هویت‌سیز تاخما آدلارلا، ملی حركتین فضاسینی هئچ‌دن بولاندیرا و عزیز بیر گون آدینا قورولموش مراسمدن سوء استفاده ائدیب، تانینمیش، فداكار و آغیر هزینه‌لره دوزموش بیری‌نین شخصیتی‌نی كورلایا! بو ایگیدلیك و جومردلیك قایدالارینا هئچ سیغیشمیر!! عجبا بعضی اینتئرنئت سیته‌لری خبرین آزادجاسینا یاییلماسینی بهانه ائدیب بئله افتراچی بیانیه‌لری و خبرلری اؤز سیته‌لری‌نین صحیفه‌سینده ایكران ائدیرلر!! بو منه چوخ بؤیوك سورغودور، آیا «خبرین آزادجاسینا یاییلماسی» بهانه‌سینه شرفلی و فداكار ایگیدلرین حیثیتینه توخونماق جایزدیر؟! آیا بو حرفه‌یه (خبر یایما ایشی) مسؤلیتین، اخلاقیاتین، دقتین، ذكاوتین، ایشلری اینجه‌له‌مه‌نین و ... هئچ بیر معنا و مفهومو یوخدور؟! منجه آذربایجان ملّی حركتی داخلینده، آذربایجان ملی منافعی اوغروندا چالیشانلار بونلارین هامیسینا دَیه‌ر وئرمه‌لیدیرلر! آذربایجان ملّی حركتی چرچیوه‌سینده چالیشان خبر و مئدییا واسطه‌لری داها آرتیق مسولیت حسّی ایله فعالیت ائتمه‌لیدیرلر:
- هویتی بللی حقیقی و حقوقی شخصلر باره ده، هویتی بللی اولمایان شخصلر، تاخما و قوندارما آدلارلا نظر وئره بیلمز! خصوصا اگر بو نظرلر مشكوك و اهانتلی اولسا! بو هویت‌سیز شخص‌لرین یازیلاری، خصوصیله منفی یازلاری یاییلمامالیدیر! یوخسا اینتئرنئت سیته‌لری و مئدیا واسطه‌لری اؤزلری مسول‌دورلار!
- فداكار فعال‌لارا، كؤلگه‌ده دوروب تاخما آدلا اوخ آتیب یایینی گیزلتمك، ایگیدلیك و جومردلیكدن اوزاق‌دیر. بئله ایشلر مخنّثلره یاراشیر!
- اخلاق و ادب حكم ائدیر خبرلرده و سایر یازیلاردا حقیقی و حقوقی شخص‌لره نسبت وئریلمیش كوبود و ارذل مَتلك‌لر، یامان - یاووزلار سیلینه و یئرینه نقطه قویولا!
- آذربایجان ملّتچیلری اؤلكه ایچینده چئشیتلی سیخینتیلارلا اوز- اوزه چالیشیرلار. یئرسیز سخینتیی ، بحران، اهانتلی یازیلار و افترالارلا فعاللاری آرتیق‌راق سیخینتی‌یا سالمایاق!!
- هر بیر ملتچی فعال طبیعی اولاراق ممكندور بعضا سهوی و اشتباهی اولا. بو سهولره تنقید ائتدیكده، اونلاری حدّیندن آرتیق قابارتماق، هئچ بیرفایدا یارادا بیلمز، عكسینه بعضی زیانلاردا تؤره‌ده بیله‌ر.
- منیم ده، عباس‌بَیین ده و هر بیر كسین ده یوخاریدا یازیلدیغی كیمی، بعضا ایشلریمیزده و یا دانیشقلارلاریمیزدا سهویمیز اولا بیله‌ر. عباس بَی ده ائله بو قناعتده‌دیر و همیشه تنقیدلری ائشیتمه‌یه حاضرلیغی واردیر! البته معین اولاراق سولدوز مراسمی بارده دانیشماق ایسته‌سك، سؤز همان‌دیر كی، یوخاریدا بحث اولدو. قوندارما آدلارلا قالدیریلمیش بئله افترالار عباس بَیه یاپیشماز!
- خبر و مئدییا واسطه‌لری بو حادثه‌نی بیر تجربه كیمی گؤز اؤنونه آلیب، بئله بیر زماندا اؤز ذكاوتلریندن داها آرتیق‌راق فایدالانیب، كؤلگه‌ده یاتانلارین قویوسونا دوشمكدن چكینمه‌لیدیرلر!
یاشاسین آذربایجان!
1390/03/25
1 yorum:
abbas bey bizim ureyimizcedi, neche an bundan once men savla onun texrib olunmasina gore nigeranliqimi bildirmishdim, ama elleriz var ki siz meni daha rahat etdiniz.
Yorum Gönder