1388 ايليندهکي ايران جومهور باشقانليغي سئچکيلر سونراسيندا اولان اعتيراضلاردان سونرا هامي آذربايجان سوسقونلوغونو دانيشيردي و بو سيراديشي و تاريخده بنزَري اولمايان سوسقونلوق قونوسوندا يازيلار يازيليب ياييلدي. بير چوخ آناليتيک، آکتيو و ايراندا ياشايان عادي وطنداشلار بئله اونون نَدنيني آختارير، آنجاق هرکس اؤز آچيسيندان. البته کي بو سوکوتون ندَنيني سئچکيلردن سونرا يا حتّي سئچکيلر عرفه سينده اولوب بيتَنلرده آختارماق بويوک بير يانليشدير.
بو سوسقونلوغون آنا ندَني البته کي آذربايجان اينسانينين ميللي کيمليک و اؤزونه گئري دؤنوشو، آذربايجان ميللي حرکتينين ايره ليله مه سيدير. آذربايجان تورکو کيمليگينين يئنيدن آذربايجان اينسانيندا دوغولماسي، کئچميشه باخيب اولانلاردان درس چيخارتماقدا، اونا يارديمجي اولدو. اؤزلليکله موعاصير تاريخده اولان مشروطه، خياباني، دئموکرات فرقه سي، خلق موسلمان حرکاتي کيمي ايتتيفاقلاردان. آذربايجان بو تاريخدن بير درس چيخارتدي، تکجه ايستيبدادا قارشي ساواشماق آذربايجانا سعادت گتيرمز. 1385 خورداد اولايلارينا باخديقدا بونو آنلادي مرکزچيليک و شووينيزمه قارشي ساواشماق، ايستيبدادا قارشي ساواشين اؤزودور. بو آنلاييش ايله سئچکي يه قاتيلان آدايلاري ايزله دي. آما اونلار آذربايجان ميللي حرکتينين تکجه بير ايسته‌یيني، ايستيبدادا قارشي دورماغي سسله ييرديلر. سئچکيلر سونراسيندا اولوشان جبهه ده يانليز بو شوعاري سسلنديرمگه چاليشيردي و هله ده چاليشير. اونا گؤره ده آذربايجان ميللي حرکتينين تام دسته‌یيني قازانماغا قادير اولماييب و آذربايجان، مرکزيتچي دئموکراتيک حرکتينين ايستيبداد قارشيسيندا آپاران موجاديله تکجه ايستيبدادا یوخ، مرکزيتچي و آپارتايد رئژيمينه قارشي بير ساواشا دؤنوشدويو زامان، آذربايجان خالقي دا بو مئيداندا اؤز گؤره ويني يئرينه یئتيره جکدير.
اينديکي دورومدا نئيله مه لي‌یيک؟
اينديکي سوسقونلوق و سسسيزليک پوزولماليدير. آما نئجه؟
بو دورغونلوق اؤزو ميللي حرکتي ده تهلوکه يه سالا بيلر، نیيه کي اينسانلارين ذهنينده ساکينليگي رئکلام ائدير. ياشيل حرکت يارانان گوندن بري، هر زامان بيز بير ايکيلي سئچَنه‌یي دوشونموشوک، اعتيراضا قاتيلماق يوخسا قاتيلماماق. ايندي‌يه قدر سوکوت اونايلانيب. اينديکي سوسقونلوق و سسسيزليک پوزولماليدير، آما بيز هر زامان سوکوتو پوزماغي و حاقلاريميزي باغيرماغي کوچه-خيابانلاردا اولان آکسييالار و گؤستريلرده آختارميشيق. بو گؤستريلرده ده چوخلو هزينه لر وئرميشيک. آنجاق بو گون خيابانلاردا دئييل ائولريميزده، قوناقليقلاريميزدا، ايشيئرلريميزده، عاييله ميزله برابر، قونشو، يولداشلاريميزلا برابر حاقلاريميزي باغيرمالي‌ييق. ميللي حرکتيميزي رئکلام ائتمک اوچون چوخ بؤيوک ایشلرین گؤرمگي ده گرکمير. اولدوغوموز هر يئرده ميللي حرکتيميزين آماجلاريني دئمک، چئوره ميزده کي اينسانلاري بو حرکته تانيش ائله مک، کيچيک بير ايش گؤرونسه ده بؤيوک ائتکيسي واردير. بو گون هر گوندن آرتيق ائولرده، ياتاقخانالاردا، يولداشلار جمعيميزده و هر يئرده قورولان ديل کيلاسلاري، تاريخي کيلاسلار و تئوريک کيلاسلارا نيازيميز وار. ياخين گله جکده نه لر باش وئرَجه‌یيني اؤن گؤرمک ايمکانسيزلاشيب. ايندي ميلتيميزه گله جک قارماسيندا نئجه يول تاپمالاريني اؤيرتمک لازيمدير. يولوموزدان چاشماماق اوچون يؤندملري اؤيرتمک گرک. بو اولورسا بير داها ميلتين خيابانلاردا باغيرديغي زامان باشقالارينا ماشا اولدوغوندان قورخوموز اولماز. بو سسسيزليک پوزولماليدير. بيز ده باغيرمالي‌ييق حاقلاريميزي. آما خيابانلاردا دئييل.
Hiç yorum yok:
Yorum Gönder