1374-جو ايلين ارديبهشت آيي‌نين 19-جو گونو، گونئي آذربايجان سياسي تاريخينده بير دؤنوش نؤقطه‌سي‌دير. ايل‌لر بويو داواملي شکيلده يورودولموش چيرکين تحقير، آيري‌سئچکي‌ليک و آسيميلاسيون سياست‌لرينه قارشي آذربايجانلي اؤيرنجي‌لرين کسکين اعتيراضي گونئي آذربايجان ميللي حرکتي‌نين گوجلنمه‌سي‌نين تمَلي اولدو. سونرالار بو گون اؤيرنجي‌لر و ميللي فعال‌لار طرفيندن "آذربايجان اؤيرنجي گونو" آدي ايله تاريخه دوشدو.
آذربايجان اؤيرنجي حرکتي چاغداش ميللي حرکت تاريخينده اَن آپاريجي رولو اويناميشدير. ايستر ميللي اويانيش سورَجي‌نين باشلانماسيندا، ايستر خرداد آياقلانمالاريندا، ايسترسه ده سون ايل‌لرده ميللتيميزين آذربايجان محورلي سياسي دوشونجه‌يه صاحيب‌لنمه‌سينده اؤيرنجي حرکتي‌نين اَن ائتکين عاميل‌لردن بيري اولدوغو دانيلمازدير.
چئشيتلي دونيا اؤلکه‌لرينده مدرن ايجتيماعي حرکت‌لره باخديغيميزدا اؤيرنجي حرکت‌لري آوانقارد، نيسبي باغيمسيزليق، ايدئاليزم و ... اؤزلليک‌لري ايله سئچيلير. بو اؤزلليک‌لر اؤيرنجي حرکت‌لريني حاکيميت‌لر و حتّي موخاليفت‌لر قارشي‌سيندا گوجلو بير تنقيد سيلاحينا مجهز ائدير.
بو آرادا آذربايجان اؤيرنجي حرکتي ده مودئرن بير حرکتين اؤيرنجي بؤلومو اولاراق، اولوم‌لو تنقيد گؤرَويني يئرينه يئتيرمه‌لي‌دير. آنجاق آذربايجانين سياسي- ايجتيماعي دوروموندان آسيلي اولاراق، اؤيرنجي‌لر ميللي حرکتين گوجلو ايجرا قوه‌لريندن بيري ده ساييلماقداديرلار.
آذربايجان اؤيرنجي حرکتي‌نين بو گونه قدر بعضي ساحه‌لرده گؤرَويني ياخشي شکيلده يئرينه يئتيره بيلمه‌مه‌سي بير گئرچکدير و اونون سيرالاريندا بعضي آخساقليق‌لار گؤرونمکده‌دير. بو آخساقليق‌لارين قالديرماسي اوچون آذربايجان اؤيرنجي حرکتي اؤز دورومونو يئني‌دن تانيملاياراق ميللي حرکتين سورونلاريني چؤزمک اوچون لازيمي مدرن آراج‌لاري اَلده ائتمه‌ليدير.
"ميللي بيرليک" و اؤيرنجي حرکتي
"گوج بيرليکده‌دير" بيلديري‌سينده سؤز قونوسو اولان ميللي بيرليک مسئله‌سي و اونون اَلده اولونماسي اوچون تارتيشيلا بيله‌جک چرچيوه‌لر و يول‌لار، اساسي سورون‌لاريميزين حللي اوچون اويغون بير پلاتفورم کيمي گؤرونه بيلر. بو پلانتفورمون آيرينتيلي شکيلده بللي اولونماسيندا اؤيرنجي‌لر اؤنملي فاکتور کيمي حساب اولماقداديرلار. بئله اولونجا بير طرفدن بيرليک ايراده‌سي و تعهودونون يارانماسي‌نين دوغال سونوجو کيمي حرکتيميزده اولوم‌سوز چکيشمه‌لر و اصطکاکي چاتيشمالار آرادان قالديريلاجاق، باشقا طرفدن ايسه اؤيرنجي حرکتي داها آرتيق فعاللاشاراق اؤزونه تعریف ائتدیگی صلاحيت‌لي دورومونا ياخينلاشاجاق.
بئله‌ليکله بيز تهران بيليم‌يوردلاري‌نين تورک اؤيرنجي‌لري بوتون آذربايجانلي اؤيرنجي‌لري "آذربايجان اؤيرنجي گونو" موناسيبتينه تبريک ائده‌رک اساسي پروبلئم‌لريميزين حللي اوغروندا اونلارين داواملي چاليشمالاريني اوموروق.
گوج بيرليکده‌دير!
تهران، اميرکبير، شريف، تربيت مدرس، علم و صنعت، خواجه نصیر، علوم پزشکی تهران و آزاد بیلیم‌یوردلاری‌نین تورک اویرنجی‌لری
Hiç yorum yok:
Yorum Gönder