آذربایجان میللی حرکاتی‌نین شانلی تاریخینده ان اؤنملی یئرلردن بیرینی توتان خورداد قیامی ۶-جی ایلینه آیاق باسماقدا‌دیر. بوگونه قدر چئشیت‌لی قوروم و شخص‌لرین موختلیف تحلیل‌لری اولسا دا، بو قیامین ان گؤزه چارپان اؤزل‌لیگی، بیر هفته ایچینده گونئی آزربایجانین بوتون شهرلرینده آیاقلانما‌لارین باش وئرمه‌سی‌دیر. اصلینده، میللی حرکاتیمیزین ایچین‌ده‌کی بعضی یارامازلارین یاراتدیغی چاتیشمامازلیق‌لارا باخمایا‌راق، بو یوکسلیشین تنظیملنمه‌سینده میللی موباریزلریمیزین سیستئماتیک چالیشماسینی اینکار ائتمک اولماز. باشقا ایفاده ایله، خورداد قیامی آپا-آچیق گؤستردی کی، داخیلیمیزده‌کی آیریشما‌لارین، بؤلونمه‌لرین سببی نه اولورسا اولسون، گرکدیگینده، آپاریجی قوه‌لرین دوز نیشانا وورماسی حاکم قوه‌یه چئوریلمکده‌دیر. بو ایسه، صمیمی موباریزلریمیزی سئویندیردیگی کیمی، بیرلییه آلتئرناتیو اولان گونده بیر بیرلیک تشکیلاتی یارا‌دان‌لارا دا درس اولما‌لی‌دیر. هامیمیز بیلیریک کی، آذربایجان میللی حرکاتی تشکیلات‌سیز بیر تشکیلات کیمی عمل ائده‌رک، بیرئی‌لرین بیر بیرین‌دن خبری اولسا دا اولماسا دا یئری گلنده عینی دایره‌ده توپلانیر. بو ایسه گلجه‌ییمیزه اولان نیگارانچی‌لیق‌لاری آزالدیر، بیرله‌شیب گوج مرکزینه دؤنوشمه‌ییمیزده یارادیلان مانیعه‌لره باخمایا‌راق، گله‌جه‌یه اولان باخیش آچیمیزی گئنیشلندیریر. شوبهه یوخ‌دور کی، بللی بیر سیستم ایچینده پلانلاشدیریب، حرکتین مسیری و فعالیت‌لرین نیظامی اؤز حَللینی تاپارسا، داها فایدا‌لی و داها بؤیوک ایش‌لره ایمضا آتیلا‌جاقدیر. آنجاق، اونسوز دا، یوکسک سیاسی شوعور و تجروبه‌یه صاحب اولان میللتیمیز، اؤزل‌لیکله مودئرن تبلیقات و ایلتیشمه ایمکان‌لارینا ییلنمیش گنج‌لریمیز، گله‌جه‌یین آیدین‌لیق قاپی‌لارینی آچا‌جاقدیر.
بو توپلو شوعورون یوکسلیشی نتیجه‌سینده دیر کی، آرخادا قویدوغوموز سون ایللرده، ایستر فورصت‌طلب‌لر، ایسترسه‌ده حیله‌گر دوشمنین بوتون قول‌لاری‌نین آزدیریجی فعالیتینه باخمایا‌راق، میللی حرکاتیمیز دوز یولوندان ساپمادی. چئشیت‌لی تبلیقات‌لارلا، بیزی یئشیل‌لره باغلاماق ایسته‌ین‌لرین آغزینی یوموروق‌لایا‌راق “آذربایجان مرکزلی دوشونجه سیستمی” داخیلینده یورودو، یاراتدی و ایره‌لیله‌دی. آذربایجان میللی حرکاتینی، ساکیت‌لیک قامچی‌سی ایله یول‌دان چیخارماغا چالیشان‌لارین جاوابیندا، تراختور حماسه‌سینی یاراتدی، اورمو گؤلون دیریتمه‌یه چالیشدی، تشکیلات‌لارینی دئموکراتلاشدیرماغا یؤنلتدی، چرشنبه‌لری بایرام‌لارا قاتا‌راق آزربایجانچی‌لیق شوعاری وئردی. هر هانسی بیر ایمکان یاراندیغیندا، هارای هارای من تورکم، آذربایجان وار اولسون کیمی میللی شوارلارلا داوام‌لی میدان‌لاردا اولدو. ایش او یئره چاتدی کی، میللی حرکاتیمیزی بویکوت ائدن بعضی تبلیقات واسطه‌لری، فعال‌لاریمیزین سس‌لرینی ائشیتمه‌یه مجبور اولدولار. خورداد قیامین‌دان گئچن بئش ایل مدتینده، تقریباً هر ۳۵ ساعاتدا بیر سیاسی زین‌دانی وئرن میللی حرکاتیمیزی فعالیت‌سیز آدلاندیران‌لار، یا سیاست‌دن آنلامیرلار، یادا غرضلی‌دیرلر.
بیز، گونئی آذربایجان میللی بیرلیک شوراسی اولا‌راق، بیرلشیب گوج مرکزینه دؤنوشمک یولوندا آپاردیغیمیز فعالیتی سونونا قدر سوردورجه‌ییمیزدن شوبهه ائدیلمه‌مه‌لی‌دیر. آنجاق، میللی حرکتچی‌لریمیزین فردلری و یا تشکیلات‌لاری‌نین تک تکی‌نین پلانلادیغی فعالیت‌لری دستک‌له‌یه‌رک، آتیلان هر آددیمی آلقیشلاییریق. امین و آرخایینیق کی، میللی فعال‌لاریمیز، زامان و مکان شرایطینی نظرده آلا‌راق، عصبلشمه‌دن، تلسمه‌دن، تله‌یه دوشمه‌دن، بوتون ایمکان‌لاردان فایدالانیب اؤز سؤزونو دیه‌جک‌دیر. بو اومیدله “خورداد قیامی‌نین” بئشینجی ایل دؤنومونده آپاریلا‌جاق فعالیت‌لری، توپلانتی، ییغینجاق و سئمینارلاری آلقیشلاییر، میللتیمیزه باشاری‌لار آرزولاییریق.
گونئی آذربایجان میللی بیرلیک شوراسی
تبلیقات کومیته‌سی
Hiç yorum yok:
Yorum Gönder