 |
| حبس اولونموش آذربايجانلي ميللي فعاللار |
آزادلیق رادیوسو: ايراندا آيري-آيري واختلاردا حبس اولونموش 11 آذربايجانلي ميللي فعالين اطلاعات طرفيندن آپاريلميش ايستينطاقلاري يئکونلاشيب و ايش ماتئرياللاري تبريز اينقيلاب محکمه سينه گؤندريليب. بو باره ده آزادليق راديوسونا موحاکيمه اولوناجاق فعاللاردان بير قيسمي نين حوقوقلاريني مودافيعه ائدن وکيل محمدرضا فقيهي معلومات وئريب.
«اساس سبب گاموح-آ عوضو اولمالاريدير»
فعاللاردان بير قيسمي گيروو موقابيلينده آزادليقدا اولسالار دا، ديگر قيسمي ايندييه قدر اطلاعات-ين تبريز شؤعبه سينده ساخلانيليردي. بير نئچه گوندور کي، باره لرينده کي ايستينطاق بيتديگينه گؤره تبريز حبسخاناسينا کؤچورولوبلر.
ميللي فعاللارين محکمه سي يانوارين 1-ده تبريز اينقيلاب محکمه سينده باشلاناجاق.
ژورناليست اکبر آزاد، طلبه لر آيدين خواجه اي و يونيس سولئيماني، موهنديس لر شهرام رادمئهر و حسن رحيمي، موعلليم شوکرالله قهرماني فر، حکيم عليريضا عبدواللهي و داها بير نئچه ميللي فعال گاموح-ا (گونئي آذربايجان ميللي اويانيش حرکاتي) عوضوو اولماقدا، حاکيميته قارشي تبليغات آپارماقدا و جاسوسلوغا يارديم ائتمکده تقصيرلنديريلير.
وکيل تام برائته اوميد ائتمير
وکيل محمدرضا فقيهي دئيير کي، ميللي فعاللارين حبسي نين اصل سببي گاموح-ا عوضوو اولمالاريدير: «آنا ديللرينه و تاريخلرينه گؤره آذربايجان ميللي حرکاتيندا چاليشيبلار. اساس فعاليتلري بو اولوب. آنجاق حاکيميت بونا داوام گتيره بيلمير. بونلارين حبسي نين اساس سببي گاموح-آ عوضو اولماقلاريدير. حاکيميته قارشي تبليغاتي و او بيري ايتتيهامي دا اساس ايتتيهاملا برابر اونلارا وئريبلر».
وکيلين سؤزلرينه گؤره، ميللي فعاللارا جاسوسلوغا يارديم و حاکيميته قارشي تبليغات ايتتيهاملاري اوزره برائت وئريلمه سينه اوميد ائدير: «ايکي ايتتيهاما گؤره برائت آلا بيلرلر، منيم بونا اوميديم وار، آنجاق اينانميرام کي، گاموح-آ عوضو اولمالاري ايتتيهامينا برائت وئريلسين».
محکمه قارشيسينا چيخماغا حاضيرلاشانلاردان بيري ژورناليست اکبر آزاددير. او، گيروو موقابيلينده آزادليقدادير، لاکين گله جکده آزادليقدا قاليب-قالماياجاغي محکمه نين چيخاراجاغي حؤکمدن آسيليدير. دئمه سينه گؤره، ژورناليستليک فعاليتي ايله ياناشي آذربايجان ديلينده نشر اولونان اوشاق کيتابلاري نين و ادبي کيتابلارين نشرينده، همچنين ميللي ديلله باغلي موختليف تدبيرلرين تشکيلينده آکتيو ايشتيراک ائدير. حبسيني ده بو فعاليتي ايله علاقه لنديرير:
بو ايش داوام ائده جک
«من ايران وطنداشي يام، گونئي آذربايجان تورکويم، گونئي آذربايجانين تورک ديلي، مدنيتي ساحه سينده چاليشيرام. او زاماناجان کي، من اؤزومو آذربايجانلي بيليرم، بو ايش داوام ائده جک. دوغومدان اؤلومه قدر بيز يورولمادان ايشيميزي داوام ائده جه یيک».
محکمه قارشيسينا چيخاريلاجاق ميللي فعاللاردان بيري آيت مئهرعلي بيلي دير. آيت مئهرعلي بيلي نين قارداشي روح اهل مئهرعلي بيلي دئيير کي، او، اوللر ده ميللي فعال کيمي موختليف تدبيرلرده ايشتيراک ائتديگينه گؤره دفعه لرله حبس اولونوب.
«قارداشيما 8 آيدا گوجلري چاتماييبسا...»
روح الله مئهرعلي بيلي قارداشي نين حبسيني بئله ايضاح ائدير: « بونونلا حؤکومت ايسته يير کي، قارداشيمين فعاليتي نين قارشيسيني آلسين. آنجاق حبسده ساخلانديغي سون 8 آيدا بونا گوجلري چاتماييبسا، بوندان سونرا دا چاتماز».
روح الله مئهرعلي بيلي دئيير کي، قارداشي 8 آي اطلاعات-ين تبريز شؤعبه سينده ساخلانيليب، ايکي گوندور کي، زيندانا کؤچورولوب. 8 آي عرضينده قارداشي ايله جمعي 1 دفعه گؤروشه بيليب. اونون سؤزلرينه گؤره، آيت مئهرعلي بيلي اطلاعات شؤعبه سينده ساخلانيلارکن اونا ايشگنجه لر وئريليب، آنجاق عاييله نين حاضيردا اونون زيندانداکي وضعيتيندن خبري يوخدور.
سس فایلینی بوردان دینله یین!
سس فایلینی بوردان دینله یین!
Hiç yorum yok:
Yorum Gönder