ای یو تی اؤیرنجی: بو گون (دوز گونو، دوشنبه) اميرکبير بيليم يوردونون فعال آذربايجانلي اؤيرنجي لري نين امگي ايله کئچيريلمه سي گؤزله نيلن تورکجه شعر آخشامي بيليم يوردون سوروملولاري طرفيندن لغو ائديلدي. بيليم يوردون کولتورل مسئله لر اوزره مسئول لاري بوندان اؤنجه شعر آخشامي نين کئچيريلمه سي ايله باغلی راضيليق لاريني بيان ائديب، مجوز وئرسه لر ده تؤرنه بير نئچه ساعات قالميش اونون لغو اولدوغونو بيلديريبلر. تورک اؤيرنجي لرين اعتيراض لاري ايله قارشيلاشان مسئول لار بو عملين ندنينده " سيزين هئچ بير قومي (!!!) فعاليتينيزه ايمکان وئرمه يه جه یيک، سيزين فعاليت لرينيز بيزيم چرچيوه لريميزه يئرلشمه يير!" دئييبلر. اؤيرنجي لرين آراشديرماسيندان سونرا ايسه لغو ائديلمه ايله باغلي حراست و امنیتی مأمورلار طرفيندن سيفاريش گلديگي بللي اولوب.
قئيد ائدک کي تؤرنه گؤره بوتون حاضيرليق لار چاليشقان اؤيرنجي لر طرفيندن آپاريلميشدي. بئله کي شعر آخشامينا گؤره آفيشالار و اعلان لار ياييلميشدي و تؤرنه 20-دن آرتيق گؤرکملي شاعير و ادبياتچي چاغريلميشدي.
آرتيرمالي ييق کي اميرکبير بيليم يوردوندا آذربايجانلي اؤيرنجي لر بوندان اؤنجه چوخ ساييلي تؤرن لر، قورولتاي لار و کونسئرت لر کئچيرميشديلر آنجاق دئيه سن بو چاليشمالار مسئوللارين و گوونليک مأمورلاري نين غضبينه توش گليب .
Hiç yorum yok:
Yorum Gönder